BUTYOG (Ilocano Daniw)

Adda maysa a gayyemko a di pulos makatalna,
Ta agparangen dagitay kuribetbet ti kudkudilna;
Kasta met tay puraw ken naing-pis nga bubuokna,
Amanganto ket no awanton tumaliaw kencuana,
Adun ti ag-agas nga us-usarenna a "cosmetics" a cuna.

Ngem cunak pamarang laeng dagitoy a pamuspusan,
Ket dida magabenan tay panagkessen ti pammagida,
Kasta met kadagitay mangpabaro ti dumaanen a ruprupa,
Ngem ad-adda ketdi nga rusanger ti pagmurdonganna,
Dida met mabaelan a sukatan ta naungkurandan piman.

Adda met dadduma idiay "24-Hour Fitness" a pappapanak,
Napalalot' ling-etda, ken nadadagsen dagiti bitbitenda;
Adda met lallaki a sarsarunnuenda piman tay buksitda,
Ta barbareng mapucawton tay kunatayo a butyogda,
Ta bareng manayunan tay ungtot' biagda a maymaysa.

Addada met babbalasang nga umabay iti pagarsisuak,
Saludsodek no dinnot' pagtrabahuanda ket ti sungbatda
"McDonald," "Burger King," wenno "Church's Chicken"
Sa isarunoda tay french fries, onion rings ken soda.
"Dagitoy ti mangpabutyog kadakami," ikatkatawada.

Adut' tagtagainepda maipapan ti masakbayan dagiti annakda,
Isut' gapuna nga ar-aramidenda amin a kabaelanda tapno
Kadi matungpal tay pagsayaatan dagiti adu nga annakda,
Ta didanto ket maulila a nasapa gaput' tangken ul-uloda,
Ta adun ti kakasta a pasamak ket dida koman mairaman.

Malagipko dagiti mannalon idiay away a naggappuak,
Inaldaw nga agmalmalemda iti kapagayan wenno kamaisan,
Ket uray no tay agtegtegerger a teltel ti baboy ti iyaponda,
Awan met tay kuna a "high blood pressure" kadakuada,
Naammuak a ti gapuna ta naduyos ti panagayus ling-etda.

Isut' gapuna ingungutek a kakabsat ditoy America,
Mapalagipantay koma tay baro a "lifestyle" a cuna,
Panangtarakentay' a naimbag bagbagitay' ken salun-at;
Tapno ditayto koma pumada kenni butyog a kaarruba,
Ta nadaras a napasamak ti iyu-una daydi maysa a kabsat.

Pinutar ni Manong Juan