Daniw: Silahis*

Adda maysa a banag a nasken unay nga iparangko,
Ta immapay a nangsukisok ti ricna toy gayyemyo,
Isu nga inkarigatanna ti nangpatibker barukongna,
Tapno adda turedna a mangyeg kadakay amin ita,
Kadaytoy maysa a banag a dinan pulos maidulin.

Tay tao a kapadatayo, binatilyo man wenno nataengan,
Adda riknana a di maawatan dagiti kapadana a parsua;
Adu a tawtawen  nga inna pinampanunot ken indulin,
Dagitoy a rikna iti tukot puso ken panunotna,
Ket no saludsodenyo no sinno daytoy: "Silahis" a cuna.

Nadumaduma a tattao ditoy, idiay ken ti met aglawlaw,
Agsusupadi ti ammoda panggep ken "Silahis: a kaduada,
Adu kadagitoy ti agpungtot no makitada,
Tay gunay tay kabsatda ta "saan nga umisu" kunkunada.
Dida pay kaabay ta amangan kunada a kakolkolorda.

Dagiti kakabsat a makunkuna a pasurot ni Cristo Jesus,
Ukradenda tay libroda a tawagenda, "Nasantuan a Biblia,"
Tapno ibasada dagiti pinilida a paset dayta a libroda
Dagiti bilbilin dagiti immun-una maipapan ken "Silahis."
Awan pagnaan ti naurnos a sarita ta narikpanen ti ridawda.

Ti met bangir padpadasenda a sukimaten tay naun-uneg,
No apay kastoy ti gungunay tay kabsatda nga "Silahis".
Agsaludsodda kadagiti ad-adut ammona a kaarrubada,
Tay pagsasao nga englis, "psychologists", ken "geneticists."
Ket ad-adu ti agcuna kadakuada: "nayanak dagitoy a kasta."

Umanay daytoyen ti agmalem nga sinniplag,
Ta tay bangir naigameren ket dinto pulos mabalbaliwan.
Ngem kuna tay bangir dida koma met unay agdardaras,
Ta no maysa a ramay ti pangitudoda, tallo met ti bagida,
Tayla tanganda ti mangtangtangel tay tallo a mangitudo.

Ditoy illi a simmangladantayo, adu metten ti naruk-atan,
Ngem ad-adu pay laeng dagiti matmata a siririkep,
Ta ammo ti kaaduan "manangbasol" ni kabsat "Silahis."
Adu pay ti nainayon: manursuro, husgado ken politico,
Ad-adalenda no ania ti baro a dana a masapul a surotenda.

Ammok a dagiti rikriknayo masair ken mapnot' riru,
Ta nabayagen unay a kayattayo ti nalawlawag a dalan,
Ngem nayunantay coma ti nawadwadwad a panunot,
Ta daytoy a banag dakkel ti ibagbagana iti siak ken sika,
Tapno ditay koma maitapuak iti nauneg unay a lugnak.

Daydi tatangko managbasa ken nasaririt bassit ti utekna,
No ukradem tay Bibliana adut paspaset a kinuloranna;
Ket nasarakak a ni tatangko silulukat ti panunotna,
Kadagiti banbanag ken panunot makasali ti pammatina.
Kunkunak iti bagik, "maaringan to met koma tay anakna."

Ala ngarud ituloyko tay saok ken kabsattayo a "Silahis."
Ket padasek nga iturong panpanunotyo iti baro a dana,
Didakto met koma laisen, iwaksi kas maysa a gayyem,
Ta ti panangad-adalko kas met la pudno daydi tatangko;
Ket padasentay met koma a suroten tay dana a makaruk-at.

Ta ditay mabalin a sublien dagiti dandanatay idi kalman,
Ti laeng mabalintayo a suroten ket tay dana nga agpadaya,
Ta no agpalaudka, lilennekan ni Apo Init ti tumpuaram.
Ngem no agpadayaka, adda baro a bigat a sumabet kenka.
Partakam ti kumamakam ta adut kadduam nga immun-unan.
_______________________________________________
*Silahis = bakla, bading, gay

Pinutar ni Manong Juan